Ashfaq Baba ke Naam!!!!!!!!

Baba Ashfaq Ahmed farmaya karte the," Log aksar mujhse pochte hen k Ashfaq sahab koe acha sa baba bataen.aur mera jawab hamesha yahee hota tha k babe aap k ird gird mojood hen,dekhne wali aankh honi chahye."

Aaj Kerala India ka ek baba mujhe milgaya,us se dua salam kaafi arse se thee magar wo zyada tar chup rehta tha,bas salam ka jawab dena he aur apne kaam se kaam.mujhe pata nahe tha k wo b koe chhupa hua baba he..uski karyana ki shop he Dammam me. Aaj yun he evening walk k garz se nikla to us ki shop se guzar hua to socha salam bhi karloon aur kuch saman bhi leloon..

Aaj baba g bare mood me lag rahe the to unho ne mere salam ka jawab to dedya magar mere ek tanzya jumle pe jo me unko hamesha kehta rehta tha k " aur sunaen baba g kya haal he,koe pareshani wareshani koe tension wension." to wo bechara mera ye jumla sun kar kehdeta tha k bas bhai theek hoon ALLAH ka karam he.

Aaj jaise he maine apna wohee tanzia jumla unke samne duhraya to kehne lage, "bhai bina pyaas k pani ki ahmyat ka kya pata? aur bina bhook k khaane ka kya maza,isi tarha bina tensions aur pareshani k life ka kya maza." me ye jumla sun k sunnn rehgya.. aur walk se wapas lot te hue poora rasta uski ye baat mujhe jhanjhorti rahee. aur me sochta raha k hum thori thori baat pe pareshan hojate hen,jaise k life he khatam hogye ho..

baat asal me masale k chhote ya bare hone ki nahe,baat he us se deal karne ki,sabit qadam rehne ki, aur apne lashaoor me ye baat bithaane ki k life he to problems bhi rahengee,unse moon morna ya khafa hona ya jaan churana aqalmandi nahe......

Me na manoo haar

Chand saal pehle ki baat he k me apne dost se milne gaya,hamari dosti buhat purani thee aur abhi b he magar fursat na milne k waja se me he nhe ja pata, to ajkal wo thora naraz he. Bulawa bhi bheja mgr phr b me na ja saka. wo bhi ek baba type ki cheez he,jab bhi jao kuch na kuch nae cheez sekhne ko mil he jati he. 

kuch saal pehle jab me us se milne gaya to wo mulaqat yadgar rahee,uske bad b ikka dukka milte rahe mgr us mulaqat me usne mjhse aik bari baat kardi. usne kaha yaar samadar ki lehron ka kabhi mushahida kya he? maine kaha yaar hum to samandar k kinare kuch aur he mushahidat karne jate hen, to muskra kar bola hamari zindagyan in samndar ki lehroon ki manind hen,samandar ki lehren hawa k zor par kinare ko choone ki poori porri koshish karti hen,jan laga deti hen,magar wohee hawa ka zor unko wapas bhi khench leta he, magar wo lehren apna kinara paane ki arzoo aur justajoo musalsal jari rakhti hen, aur himmat nhe harteen.

humen apni zindagy bhi kuch in lehron ki tarha guzarni chahye,kinare tak puhnchane k lye zindagy me bhi koe na koe hawa ka jhonka aa he jata he, aur kinare tak puhnchate puhnchate humen phr peeche dhakel deta he, magar aisa karte karte kabhi kabhar hum himmat har jate hen aur khud ko samndar k hawale kardete hen.

Maine kaha yaar wo sab baat theek he magar kinara mil gaya to bas wo arzoo aur justajoo ka silsila khatam hojaega na,phr kya karna he? uske baad zindagy ka kya maqsad reh jata he, kisi arzoo ya kisi justajoo k beghair zindagy bhi kaisi zindagy.

phr muskraya aur bola budhoo me bhi to yahee keh raha hoon,tmne wohee baat kisi aur tareeke se ghuma k kahi he, me ye keh rha hon k kabhi samandar ki lehren bhi khatam hue hen kinare tak na puhanchne k dukh me? nahe na? yahee zindagy he,koshish karte rehni chahye,kinara mil hee jata he..

uske baad maine ijazat mangi,aur me wahan se nikal k ghar aan puhncha. to ghar aate he uski ye baat maine kahen note bhi kardi thee magar yaad nahe raha k kahan likhi thee,to aaj taqreban koe teen saal baad ye baat yaad agye.. Faheem Akhter